$1.5 MILIONA LE MEAALOFA A LE FALETUPE O ATINA’E A ASIA (ADB) MO SAMOA AUĀ LE KOVITI – 19

SAMOA, August 20 - (OFISA O LE SO’OUPU); O le asō na talia ai e le Malo o Samoa le fesoasoani tupe e $1.5 miliona tala Amerika, ua fa’ameaalofa (grant) mai e le Faletupe o Atina’e a Asia (ADB) e fesoasoani ai i tapenaga a Samoa e tali atu ai i le Koviti – 19.

O le Minisita o le Matagaluega o Tupe, Sili Epa Tuioti fa’atasi ai ma le Fa’auluuluga o le Ofisa o le Faletupe o Atina’e a Asia (ADB) i Samoa nei, ia Tuala Maria Melei Tagilima na saini lima mo le fa’amatu’uina mai o lenei fesoasoani.

O lenei seleni ua tu’uina mai, o le fesoasoani a le Malo o Iapani e $75 miliona tala Amerika, sa tu’uina atu i le Faletupe o Atina’e a Asia (ADB), mo le fa’asafuaina atu i atunuu tetele ma atunuu laiti o le lalolagi e aofia ai ma Samoa.

Mai i lea seleni, e $13.3 miliona tala Amerika le tupe atoa ua fa’asafua atu mo atunuu e sefulu o le Pasefika e aofia ai, le Atu Kuki, Kiribati, Atu Masela (Marshall Islands,) Maikolenisia, (Federated States of Micronesia), Palau, Papua Niu Kini,Tuvalu, Vanuatu ma Samoa.

O le tolu ai nei o fesoasoani fa’ameaalofa a le Faletupe o Asia mo Samoa i lenei tausaga, e aofia ai le $20 miliona sa tu’uina mai i le masina o Iulai ma le $2.9 miliona sa fa’amatu’u mai i le masina o Aperila 2020 auā lava le puipuia o le atunuu mai le Koviti – 19.

O le ADB na fa’avaeina mai le tausaga e 1966, ma o lo’o pulea e ona sui auai e 68 mai itulagi e 49 o le lalolagi.

O lenei fa’amoemoe sa auai ai le Minisita o le Matagaluega o Tupe, Sili Epa Tuioti, Fa’auluuluga o le Faletupe o Atina’e i Samoa ia Tuala Maria Melei Tagilima, Sui o Iapani i Samoa nei ia Kishi Isao ma le Ofisa Sili o Pulega a le Matagaluega o Tupe ia Leasiosiofa’asisina Oscar Malielegaoi.

O le naunauta’iga o le Faletupe o Atina’e a Asia e pei ona saunoa Tuala e avea na sui o le faletupe, ia mautinoa le malu puipuia ma saogalemu le Pasefika ma le Atu Asia i le ono a’afia ai i se oge tele i le lumana’i e mafua mai ona o le tulaga fa’aletonu o i ai le lalolagi i lenei vaitau ona o le Koviti – 19.

Na fa’afetaia e le Minisita o le Matagaluega o Tupe, le fesoasoani a le Malo Iapani e tauala mai i le Faletupe o Atina’e a Asia (ADB), e fesoasoani ai i puipuiga ma tapenaga a Samoa auā le tali atu i le fa’ama’i o le Koviti – 19.